НОВОГОДИШНА ЧЕСТИТКА ОД МЛД "КОЧО РАЦИН" МЕЛБУРН

Измина уште една година во која продолжи нашата мисија во промовирање на нови литературни дела на нашиот Саем на книгата. Посебен акцент се стави на вклученост на поголем број читатели и љубители на македонската поезија и проза во литературното читање.

Вклученост на најмладите деца во нашата програма Од буква до буква азбука која им дава можност на сите деца да се запознаваат со македонските букви и да изразат желба за изучување на македонскиот јазик. Од огромно значење е постоењето на литературното друштво кое преку организирање на саем на книгата, литературни читања, фестивал на писатели, Македонски фестивал на храната, наоѓа пат до македонската публика да ја поттикне се повеќе љубовта кон пишаниот збор, кон книгата и убавата поезија и проза.

НИЕ СМЕ НАШИТЕ ИЗБОРИ

Мисли од францускиот писател Жан-Пол Сартр

„Можеби имало поубави времиња, но ова е нашето време.“

„Ти си – твојот живот и ништо повеќе.“

„Сѐ е откриено, освен тоа како да се живее.“

„Се чини дека сѐ што знам за мојот живот, го имам научено од книги.“

„Животот започнува од другата страна на очајот.“

„Зборовите се наполнети пиштоли.“

„Како и сите сонувачи, јас го мешам разочарувањето со вистината.“

„Човекот не може да направи ништо сѐ додека не сфати дека тој не може да смета на никој освен на себеси; дека тој е сам, напуштен на земјата среде неговите бескрајни одговорности, без помош и без никаква цел освен онаа која тој самиот ја поставува и без ниту една друга судбина освен онаа која самиот си ја создава на земјата.“

ЛИТЕРАТУРАТА, ТЕМЕЛ НА ЖИВОТОТ

Литературата нè потсетува на приказни, епови, свети списи и класични дела од старото и модерното време. Таа е дефинирана како тело на пишани дела на јазик, период или култура, произведени од научници и истражувачи, специјализирани за одредена област. Зошто е важна литературата? Тие се опис на различните аспекти од животот на обичниот човек. Класичните книжевни дела служат како храна за размислување и ја поттикнуваат способноста да се измислува и способноста да се создава нешто. Читањето на добри литературни дела, е еднакво на давање на можности за најдобро образование. Од друга страна, недостатокот на изложеност на добра литература е еднаков на лишувањето од можноста да се напредува.

Многу дела во литературата создаваат силна врска со читателската публика преку приказните што ги раскажуваат или пораките што ги пренесуваат. Читателите имаат тенденција да се дружат со емоциите прикажани во овие дела и да станат емотивно вклучени во нив. Според тоа, книжевноста има длабоко влијание врз размислувањето и гледањето на животот.

Самиот поим литература доаѓа од латинскиот збор littera и значи познанство на буквите. Литературата е уметничко јазично творештво на еден народ . Низ различни историски периоди се здобила со различни карактеристики. Најраните дела, најчесто се осврнувале на религиозни и советувачки пораки. Средниот век ја носи романсата, националистичките епови и философската мисла.

ЗА КОСТА СОЛЕВ РАЦИН

Коста Солев Рацин (1908 - 1943) е една од најистакнатите интелектуалци што ги дала Македонија во периодот помеѓу двете светски војни, но и воопшто. Најпознат е по својата збирка песни „Бели мугри“, поради која се смета за основоположник на современата македонската литература, но Рацин беше многу повеќе од само наш најдобар поет помеѓу двете светски војни - неговата активност како истакнат работнички и комунистички деец обично се потиснува во втор план, но сликата на Рацин без овој елемент не соодветствува на реалноста.

Покрај тоа што се занимаваше со поезија, Рацин има напишано и прозни и теоретски трудови. Неговите написи за богомилите, за Хегел и за феминизмот претставуваат ремек дела за тогашната македонска комунистичка и напредна сцена. Тој целосно беше над карактеристичниот „комунистички стил на теоретизирање“ препознатлив преку тирадите со безбројни етикетирања и апотеози на лидерите, нешто што во Македонија и многу подоцна беше вистинска реткост. Во иста насока е и следниов став на Блаже Конески: „Во Рацин имаме најиздигнат македонски народен интелектуалец од неговото време, најкултурен наш човек. Тоа што го рекол и како го кажал Рацин за богомилите не можеше да го постигне тогаш ниеден друг македонски интелектуалец. Чест му чини на Рацин дека тој од обичен работник - грнчар со упорно самообразование се издигна така високо.“

ЛОЈАЛНА ДО СМРТ

Извадок од книгата Loyal unto death: Trust and terror in revolutionary Macedonia – Keith Brown

Користени податоци од Британското министерство за надворешни работи и Националниот архив во Скопје. Во 1896 година Кејт полага заклетва и станува член на Македонската Револуционерна Организација. Кога Гоце Делчев дојде во Прилеп, некој му кажувал за мене и ме повика на состанок. Од тој ден ме прими во главниот штаб на организацијата во прилепскиот округ.Во 1902 година кога четата на Методија Пачев беше разбиена, уништена во село Кадино,

ВЕЗ

Силно светат, паѓаат

Тивко, нежно

Да не ја вознемират

И прекинат таа нишка,

Ја осветлуваат твојата вредна рака

Конци црвени, црни

И ред други бои

Ти не знаеш за мака

Продолжуваш да везеш

Твоето срце полно со љубов

Кој би можел тебе да не те сака?

ИМА ДОЛУ ЕДНА КРВ

Ацо Шопов

Има долу тешка една крв

од древноста чиниш останата.

Не се ни наѕира во врелите маглини на овој врв.

Лежи проколната како лузна врз раната.

Има долу една тешка крв. Има крв една.

Има една крв густа како црна смола.

Крв ненаситна и исконски жедна.

Има една стара крв, црна и гола.

Лежи она и рие како крт.

Оди од праг до праг, рие низ свеста.

Непогрешно и неизбежно како смрт

ги исполнува сите празнини и места.

"МЛД КОЧО РАЦИН" МЕЛБУРН СО НОВО ЛИТЕРАТУРНО ЧИТАЊЕ

СВОЕВИДНА АФИРМАЦИЈА НА МАКЕДОНСКАТА ЛИТЕРАТУРА ВО АВСТРАЛИЈА

Mакедонското литературно друштво Кочо Рацин, Мелбурн, крајот на годината го одбележа со Литературно читање одржано на 29 Ноември во библиотеката во Мил Парк. Читањето беше наречено Мојата омилена приказна а во чиј склоп се одржа и едукативна програма за деца Од буква до буква – азбука.

Членовите на дурштвото избраа да читаат омилени приказни, поеми, драми, извадоци од романи на Македонски и Англиски. Навистина беше вистинско уживање да се слушне нешто од првите македонски драмски писатели ( Ристо Крле - Антица –), расказ за грабнувањето на Калина од турскиот аскер и нејзиното проштално писмо до мајка и, дел од современиот роман на Сашо Димоски (Алма Малер), мемоари од книгата на Андон Дончевски, прекрасно прозвучија и авторски поеми и четива  од Вера Горгиевска, Крсте Наумовски (Грамотник), заедно со Дона ја прочитаа и поемата Јагула од Анте Поповски, Стеван Ацески (Солунски браќа). Прекрасни настапи имаа и гостите кои се пријавија да читаат: Танас Петрин со поеми од неговиот татко: Деца бегалци, Песна за Нерет и Крушевската република, Василка Патерас (Празнина и Невена), Вера Мажеска (Т’га за југ и свои поеми), Сашка Ставреска (Македонец да си), Розита Груевска (Не дај боже). За првпат настапи и Адриан Горгиевски кој со голема љубов прочита свој состав за Александар Македонски а Даниел Димовски повторно восхити со драматизацијата на расказот “Калина“.

ДА КОРИСТИМЕ ПОВЕЌЕ МАКЕДОНСКИ ЗБОРОВИ НАМЕСТО ТУЃИ

Зборови кои можат да ги заменат интернационализмите и англицизмите

фигурира - се користи, постои

практиката - примената

регулација - уредување

аспект - страна

нормата - правилото

трендот - настроеноста

контакт - поврзаност

сумира - собере

ревидира - преправи

магацин - складиште, склад

ЛИТЕРАТУРНОТО ДРУШТВО "КОЧО РАЦИН" МЕЛБУРН СО САЕМ НА КНИГАТА

БРАЌА И СЕСТРИ МАКЕДОНЦИ И МАКЕДОНКИ!

"Зар не паѓа дожд од Бога на сите подеднакво?

Или сонцето не свети за сите, исто така?

Зар не го дишеме воздухот сите еднакво?

Како тогаш не се срамите да признаете само три јазика, а за сите други народи и племиња сакате да бидат слепи и глуви? Дали Господ го сметате толку бессилен тоа да не може да го даде, или завидлив, па тоа да не го сака?

Со овие стихови на Свети Кирил се отвори Саемот на книгата 2018 кој го организира МЛД “Кочо Рацин” Mелбурн во библиотеката во Мил Парк. Потоа следуваа и поеми од Кочо Рацин, Крсте Наумовски, и Љубица Поповска прочитани од Крсте Наумовски и Весна Дамчевска.

Саемот на книгата се одржува секоја година во чест на Свети Кирил и Методиј кој воедно е и потсетување на значајноста на нивната величенствена мисија, во просветувањето на народот и создавањето на првата азбука.

ОД СВЕТОТ НА ЛИТЕРАТУРАТА

Интересни факти од светот на литературата: 

1. Се верува дека најстарата книга во светот е стара повеќе од 2500 години. Таа се нарекува Баккара книга и е напишана на етрурски јазик, која сега е исчезната. Се состои од 6 страници, испечатени на чинии од чисто злато.

2. Бидете внимателни што читате! Научниците открија дека љубителите на уметничката литература потсвесно ги прифаќаат карактеристиките на ликовите на измислените ликови од книгите и се однесуваат како ликовите што ги идентификуваат. 
 3. "Codex Leicester", од Леонардо Да Винчи е најскапо научно списание, продадено за 30,8 милиони долари.
4. Најдолга книга во светот:
‘A la recherche du temps perdu’ (Во потрага по изгубеното време) од Марсел Пруст е најдолгата книга во светот со 9.609.000 знаци. Книгата раскажува за случувањата на писателот во текот на неговото растење.
5. Најдолга реченица од 823 зборови е забележана во романот на Виктор Иго - Les Miserables

КОНТАКТ

Contact the Association on our email: mld.kocoracin@mail.com
Mobile: 0423 496 821 (Gordana)
Mobile: 0488 001 946 (Nove)

ДА КОРИСТИМЕ ПОВЕЌЕ МАКЕДОНСКИ ЗБОРОВИ НАМЕСТО ТУЃИ

Практично - применливо

економија - стопанство

историја - минато

комбиниран - измешан

лектор - стручњак за правопис

магазин - списание

локално - месно 

колумна - статија

контакт -поврзаност

лексикон - толковник

НА КИНИСУВАЊЕ

На кинисување
Позапри, мајко, затрај се,
доста ме, леле, испраќа,
доста си солзи излеа
по тија пусти патишта.
А туку, мајко, погледај,
погледај, леле, послушај,
како ми пилци запреа
песни сред пролет радосна,
како ми вода затраа,
темни ми карпи писнаа,
а гора лисја пророни
од твојте тажни гласови.
Јас, мајко, тргнав, заминав,
куса си пушка нарамив,

ЉУБОВНИ ЦИТАТИ ОД НАШИ ПИСАТЕЛИ

- Ништо не е повидливо и ништо не е поприсутно од твоето отсуство. (Петре М. Андреевски)

- И мојата душа нека биде твоја, а мое да биде твоето лице. (Ацо Караманов)

- Ќе те претплатам на вечна љубов и вечни времиња, ќе те љубам и губам и во пости и пред гости, само да ме сакаш. (Петре М. Андреевски)

- Па сепак, окото и увото се праг на надежта, што она ја засолнила. (Гане Тодоровски)

- Не иди, зашто жалосна би била, и колку да те копнеам – се ледам. (Блаже Конески)

ДЕЛА ОД ПОЗНАТИ ПИСАТЕЛИ

ЕВГЕНИЈА ГРАНДЕ - ОНОРЕ ДЕ БАЛЗАК

Евгенија Гранде е уште едно ремек - дело на францускиот реалист Оноре де Балзак кој зборува за љубовта, алчноста, семејните врски како и перфидноста со која се одликуваат личностите во овој роман.

Феликс Гранде е борат трговец од францускиот град Сомир, кој се збогатил брагодарејќи на неговото инвестирање во претходно добро проверените бизниси. Така тој станува почитувана личност, кој го ужива престижот да биде почесен граѓанин меѓу малодушните луѓе во малиот град.

Тој се жени за ќерката на богатиот стопан де ла Бертелиер со која ја имаат ќерка Евгенија...

ЛЕГЕНДА ЗА ГОРДИЕВИОТ ЈАЗОЛ

Интересна е легендата за Гордиевиот јазол и врската со Александар Македонски.

Приказната почнува со кралот Гордиј кој станал крал на Фригија иако немал сина крв. Тој бил обичен селанец кој преживувал од земјоделство со помош на своите волови и запрегата. Еден ден кога тргнал кон своите ниви забележел како еден голем кралски орел постојно се обидува да застане на неговата запрега. Каде и да појдел со запрегата орелот одел по него. Гордиј во тој момент решил да се упати во најблискиот град и да побара совет од тамошното светилиште. Отишол во градот Телмија фригијска. На влезот во светилиштето сретнал една млада пророчница, која кога ги видела орелот и запрегата со неговите волови му рекла веднаш да принесе жртва на Зевс. Девојката го замолила да појде со него во градот, но откако Гордиј пред Зевс ќе даде ветување дека ќе ја земе девојката за жена.

ИЗГУБЕН ПАТНИК

Еј патниче

Доаѓаш ли да останеш

Или на минување си?

Одот ти е забавен

Како почетокот на орото

На она нашето, “тешкото”.

Можеби не знаеш

Можеби не ме разбираш,

Јас сум Македонка

Ти зборувам на Македонски

А ти се чудиш

Ме гледаш, не зборуваш

Мислите ти одлутале пак

Ни сјајот на сончевиот

Зрак не може

Да го осветли твојот мрак.

СООПШТЕНИЕ

Македонското Литературно Друштво Кочо Рацин од Мелбурн ќе одржи литературно читање насловено како Мојата омилена приказна. Ги покануваме заинтересираните од сите возрасти да се пријават за читање на нивна омилена приказна, извадок од омилена книга или поетска творба.

Во едукативната програма ќе имаме активност: Од буква до буква – азбука со цел најмладите да се запознаат со македонската азбука преку боење, пишување и изговарање.

Следуваат и награди за најмладите кои најдобро ќе ги прочитаат своите избрани творби.

Настанот ќе се одржи Четврток на 29 Ноември во библиотеката во Мил Парк од 6.00 – 10.00 навечер.

ДЕНОВИ

Денови – Кочо Рацин

Како на вратот ѓердани

ниски камења студени,

така на плешки денови

легнале та натежнале.

Денови ли се – денови

аргатски маки големи!

Стани си утре порано

Дојди си вечер подоцна,

наутро радост понеси

навечер тага донеси –

ај, пусти да е, пуст да би

останал живот кучешки!

ЗОШТО Е ДОБРО ЧИТАЊЕТО

Читањето на било која литература, може да го прошири твоето разбирање за светот. Оние кои читаат, се познати дека имаат повеќе развиени мозоци од оние кои претпочитаат повеќе пасивни активности, па секој кој сака да го подобри својот ум и психички и когнитивно, би требало да размисли да ја зголеми навиката за редовно читање.

Зошто да читаме?

 1. ДА СЕ РАЗВИВААТ НАШИТЕ ВЕРБАЛНИ СПОСОБНОСТИ

Оние што читаат имаат тенденција да имаат поинаков спектар на зборови за да го изразат начинот на кој тие се чувствуваат и да ја пренесат својата поента. Колку повеќе читаме толку повеќе го збогатуваме нашиот вокабулар и користиме во секојдневниот живот како вешти комуникатори.

2. ГО ПОДОБРУВА НАШИОТ ФОКУС И КОНЦЕНТРАЦИЈА

За разлика од читање на блог постови и новинарски статии, седнувајќи со книга в рака, потребен е подолг период на фокусирање и концентрација што е малку тешко да се направи на почетокот. Да се ​​биде целосно ангажиран во една книга, потребно е затворање од надворешниот свет и внесување во текстот, кој со текот на времето ќе го зајакне нашиот распон на внимание.